Polar M430 GPS心跳錶 | 跑步裝備 精選

早前係網上見跑友們對Polar M430既討論都幾正面， 令我心郁郁買左隻返黎試。隻錶原價$1,880，舖頭問多幾句就有折扣，折左都係$1,600多少少。

以心跳錶黎講，Polar係第一個研發監測心跳率既品牌，而且好多報導都表示Polar係測心跳方面既準確度高，所以好多高手都會用。M430採用6粒LED燈測心跳既技術( 亦都係第一個品牌採用呢個技術 )，相比而家市場上既心跳錶都係以2-3粒為主，準確度方面都會有信心保證。

M430 可以透過手機或電腦做setup，步驟唔多講，因為官方都有片介紹，我個人建議用電腦做setup，因為真係快好多。

Get started on Mobile
Get started on PC

當初決定買M430既其中一個原因係佢內置既加速感應器，可以係收唔到GPS既地方測到速度同距離，岩晒我呢d夏天怕熱轉去gym room度跑既人。M430既加速感應器會隨住你擺手既幅度即時顯示速度同距離，如果係比賽跑到無GPS訊號既地方， 例如渣馬入西隧果個位，呢個功能就真係好重要 。另外要讚既位係M430錶帶設計有好多窿窿，透氣度唔錯，我跑完時手腕都唔會覺得好焗。
*大家要留意返錶上cadence既顯示係每分鐘單腳既步頻。

去到GPS方面，呢排唔係落雨盲係酷熱天氣警告既情況下，我並未試佢既GPS準確度，但係網上見到有用家分「平時GPS例如我葵芳跑入深井用google map計係9.4km, M430計到9.38km」。由於M430採用A-GPS，每兩星期透過Polar FlowSync去更新GPS都會令M430更準確。 另外，佢有GPS慳電模式，大約60秒記錄一次，令電池續航力係訓練時可用到30個鐘。對我黎講雖然用唔著，但對參加超長距離比賽既朋友係一大福音。

M430有幾個有趣既功能，其中一個就係Fitness test，係你靜止時測你既VO2max – 最大攝氧量。大概用幾分鐘時間就測完，得出結果後再同步去Polar Flow就可以睇到更多既comment( 真係唔測唔知身體好，估唔到我VO2max都有good既水平 )。

另一有趣功能就係Sleep Plus睡眠監測，佢唔單止話你知你瞓左幾耐，仲話比你知你瞓覺時邊段時間瞓得無咁好，邊段時間有干擾。試左呢個功能幾日，我發現當做完運動果日瞓覺既睡眠質素會好d，干擾都會少d。

仲有一個窩心既設計就係M430會根據你一開始輸入既個人資料，推算出你既建議活動量。如果當日仲未達到建議活動水平，佢仲會比建議你做咩活動可以達成當日既活動量。

總結
用左幾日Polar M430，戴上身感覺都輕身舒服。對佢功能同表現都十分滿意，而且用手機過數據到Polar Flow到好穩定。如果硬要挑剔既話，就係錶面係一塊膠，比人感覺易刮花。以同類型既運動手錶相比，M430係值得推薦比人使用！