SPERRY 7SEAS 試穿報告：夏日必備水陸兩棲休閒鞋，浸水一樣冇問題 精選

香港夏天又濕又熱，有時買咗對新鞋著出街，遇著落雨真係喊出嚟！夏天天氣反反覆覆，間唔中都會冇啦啦落大雨，如果有對防水鞋傍身就唔同講法喇。

偏偏好多防水鞋都唔係咁靚，一係成對水靴或者拖鞋咁，好多場合都唔適合著，一係個款太笨拙，想兼顧到外觀同功能真係唔容易。今次小編終於搵到一款又易襯，又防水嘅鞋款，晴天雨天都冇問題。

今次試著呢對鞋屬於 Sperry 7Seas 系列，Sperry呢個專門造帆船鞋嘅美國品牌，喺1930年代設計咗專門為美國海軍製造適合甲板工作嘅帆布版牛津鞋。



小編手上呢一款7Seas以黑色為鞋身主色，配搭白色鞋底，雖然唔係咁搶眼，但勝在容易襯，揉合咗 Sperry 適合水上活動嘅傳統設計，同埋年輕、潮流嘅風格。


Sperry專造帆船鞋，但今次嘅鞋面就唔係用傳統嘅皮革，而係用上HydroX 功能網面同埋HydroPel 覆膜技術，所以鞋身有一定程度嘅防水功能。


除咗SeaBound中底嘅彈力吸震功能，仲有特別嘅排水孔設計。如果對鞋入水，可以透過呢個排水孔排出。


由鞋墊可以睇到，前掌同後跟位置同樣有排水孔整合落中底，避免咗積水嘅問題。


鞋底方面，前掌同後跟位置都用咗Wave-SipingTM 專利剃刀紋加強防跣功能，中央大面積膠粒設計，仔細啲睇，每一粒上面都有剃刀紋，耐磨防滑，就算喺甲板上面都抓地性能一流。


唔好話平時落雨，連水上活動都頂得住，因為7Seas系列係真正可以喺帆船上著嘅帆船鞋，連美洲杯帆船賽 (America's Cup) 嘅衛冕冠軍隊ORACLE TEAM USA都係著住7Seas系列比賽。


小編親身試著，就覺得佢嘅「360度環繞鞋帶」，綁緊之後可以幫助鞋身更貼服包裹雙腳，活動時更加靈活。特別係由於官方介紹都建議水上活動或雨天時，可以唔著襪 (對鞋唔吸水但對襪會吸水) ，呢個時候就更加體驗到「360度環繞鞋帶」嘅重要性，因為唔著襪會令鞋內多咗空間，而呢個設計的確可以令對鞋包返緊雙腳，雙腳唔會喺鞋籠入面「浪下浪下」，咁就唔會刮腳啦。


另外，鞋身採用 MocFit 無縫設計，同埋用料柔軟，所以個人感覺，即使唔著襪都唔會被鞋內嘅接口位刮到，一樣舒服。


到咗重點嘅防水功能，小編自己就比較少水上活動，主要都係希望佢喺落大雨嗰陣，鞋籠唔好水浸，返工唔使焗「足」一日就已經好夠。


今次專登裝咗一桶水淋落去，直情感覺到啲水喺鞋底排水孔流返晒出嚟，而鞋身質料唔會吸水，所以完全唔會有焗住嘅感覺。


小編就係咁樣著住對淋完水嘅鞋返上公司。如果係普通波鞋，除咗會「噏」住全日之外，返到屋企曬幾日都唔會乾晒。不過因為Sperry 7Seas嘅設計疏水，對腳冇「噏」住不但止，喺有冷氣嘅地方 (例如office) ，吹幾個鐘都乾透。

總括嚟講，小編認為Sperry 7Seas係一對水上活動同埋雨天必備嘅水陸兩棲休閒鞋，就算平日著出街都一樣有型，夠晒百搭！