喺英國時間周日，除咗有世界排名第二嘅英國球手Andy Murray第二次喺主場捧盃威番次之外，其實仲有個英國人一樣咁威威！講緊嘅就係英國女將Heather Watson夥拍芬蘭球手Henri Kontinen，喺決賽贏咗15號種籽嘅Robert Farah同Anna-Lena Gronefeld組合，成功捧起溫布頓網球公開賽嘅混雙冠軍獎盃，仲創下多個紀錄！
呢對冠軍組合，都可以話係今屆賽事嘅黑馬。事關英國第二嘅Watson，喺之前從來未試過喺大滿貫賽事超越第三圈，加上同拍檔Kontinen合作咗唔係好耐，喺今屆溫網仲要以非種籽身份出賽。
不過，佢哋竟然喺第三圈爆冷贏咗衛冕嘅Leander Paes/Martina Hingis，一路殺入決賽，真係令人大跌眼鏡。
今場決賽都打得幾緊湊，雙方喺第一盤都成功保住發球局，一度打成局數5:5，之後Kontinen/Watson連拎兩局，以7-6(5)先贏一盤。
去到第二盤，德國嘅Gronefeld喺第7局打出double fault發球雙失誤，白白送咗畀對手做出今場決賽唯一一個破發，最終Kontinen/Watson保持優勢，贏得冠軍。
今次捧盃對Watson嚟講意義重大，佢打入決賽嘅時候已經係自2007年Jamie Murray打入溫網混雙決賽嘅英國球手，又係1987嘅Jo Durie以嚟，第一個英國女將拎溫網混雙冠軍。
仲未講完，最威水係佢同男單冠軍Andy Murray，兩個英國球手同時贏溫網錦標，上次已經要數到1937，Dorothy Round Little贏女單同Billie Yorke贏女雙喇！
當然，Watson嘅拍檔Kontinen都唔弱，佢都成為芬蘭史上第一個贏得大滿貫錦標嘅球手！
完成呢個壯舉之後，Watson都開心都死：「我真係笑到停唔到呀，完全形容唔到有幾興奮」，同時都不忘讚吓佢位好拍檔Kontinen啦：「我好難搵到一個比Henri更好嘅人，可以同我一齊分享呢個美好嘅經歷。我哋一齊打波嘅時候好開心，所以我哋咪打得咁好囉！」
請按此登錄後留言。未成為會員? 立即註冊