露營系列篇 - 新手最常遇到既問題 - 食物處理篇

港女去行山 於 06/12/2020 發表 收藏文章
最近港女同朋友無得外遊,就唯有去露營。上一次去個陣,吾想稔菜單,就上網搵。但係又好似吾多岩港女口味。搵搵下,又吾多見到詳細講解點樣處理食物本身。所以港女就稔下不如都寫一個系列講食。

露營性質

凡事都無對錯,只要目標不同。去露營上山都一樣。要知道自己既目標同埋方向,就知道應該點樣去選擇。

一般而言,港女去遠足(者一個大背囊,行十至二十公里)都吾會建議帶罐頭或者海鮮。因為罐頭會製造垃圾而且增加重量,而海鮮容易引起腸胃不適。

如果只係去營地露營,附近能夠提供洗手間。而且會自己帶走垃圾。其實真係帶咩類既食物去煮都可以。但係港女一般都建議,睇去邊個營地,行幾遠,有無洗手間。如果呢一類既設施都有既話,可以考慮更多元化既食物。

不過,一定要留意天氣。因為天氣會令食物更易變壞。

肉類:
因為肉類屬於相對容易變壞既食物。所以一般都需要冷藏處理,以保持新鮮程度。

圖片入面,見到既煲,就係我地所講既cookset。而cookset 既大細係根據人數而定。有一至二人,三至五人等等。而基本上每一套cookset 都會有吾同大細既煲,一隻煎pan 同幾隻碗。因為港女吾係賣廣告,所以就吾近鏡影啦。

與此同時,港女會建議大家,除左牛扒之外,大部分既扒類都需要切細舊D。方便煮食。因為煎pan 或者叫cookset (者山上面既煮食用具既名)都會比較小巧,一次可以處理既食物數量比較少。同一時間,營地一般屬於高地,所以比平地大風。於是,火源會更加吾穩定。所以綜合上述情況,煮食時間會比較長。如果預先做好,例如切細舊,切粒或者切條都可以縮減煮食時間。

至於牛扒,因為比一般肉類易熟。所以建議將牛扒切開一半。其實已經可以。

塔門係一個背山面海既好地方。但係就係因為太好,於是夜晚煮飯個陣。港女用左三個鐘頭煮,因為太大風,gas爐既火吾夠穩定。所以只好用慢煮既方法去處理。

處理肉類要特別留意露營季節:

例如炎夏去露營,肉類會建議預早4-5日買。然後放入冰格。但係如果寒冬去,就未必需要甘早,可能早2-1 日買,然後放入冰格已經可以。

因為大部份人去露營,都會需要搭車,然後等到晚上先至煮。所以要保持肉類係低溫急凍狀態就需要少少既包裝。

呢兩個,係港女既收藏黎。因為港女十分仲意食甜品。所以去日本機場買甜品個陣,都會有好多呢一類既袋。如果日後再去日本個陣,港女建議大家吾好掉左佢。其實呢一類既袋,質地好好,而且實用。可以重用吾好浪費啊。

港女首先會拎一d錫紙質地既袋。例如買日本蛋糕既時候,會有個錫紙袋裝住個蛋糕。呢個錫紙袋係十分好用。所以港女通常買完蛋糕都會留番個袋去露營用。 而且只要吾整爛佢,基本上,係可以重用。相對環保同輕。

又或者用毛巾包住d食物。效果一樣甘好。而毛巾仲可以用黎做抺布,一物多用。

若果屋企有發泡膠盒都可以用。因為發泡膠既保溫效果其實都吾錯。但係用完記得帶走,吾好留係郊外,影響環境。

以前細個,屋企人好仲意用報紙黎包食物。港女仲係行山初哥既時候。都會包好厚既報紙上山。但係食物會慢慢解凍,報紙吸曬d 濕氣就會越來越濕。港女仲要行多十公里先至完當時既旅程,番到市區。自個次之後,港女就吾敢再用報紙包食物。

當然,報紙都有保溫既效果。但係保溫既成效吾夠上述三款既效果好。其次,報紙濕左,又重,又大舊。所以,真心吾建議帶上山。

最後,只要有個保溫袋,其實保溫效果已經好好。其實只要買過冰皮月餅,屋企都會有番一個半個保溫袋。拎個一類袋就可以,吾洗再去買。

海鮮:
圖片取自網絡,海鮮係一樣十分好食既食材。但係要留意海鮮既腥味有機會會引黎好多昆蟲。所以處理要特別小心。

選擇:
剛才提到海鮮會有腥味。其實係指魚骨、蝦皮、蠔殼等等既垃圾。所以只要無呢一類既垃圾就會易處理好多。例如買魚柳代替魚扒,去左蝦皮既蝦以及無蠔殼既蠔作為食材。

處理方法:
處理海鮮同處理肉類一樣。但係海鮮最好要早3-4日買,因為一但食物變壞就容易腸胃不適。所以一定要小心處理呢一類食材。

一般港女都會揀冰鮮既魚柳、蠔或者蝦(當然係揀無殼)

蔬果:
蔬果係屬於最容易處理既食材。不過就係因為容易處理。新手往往最易掉以輕心。

濕vs 乾
圖片取自網絡

如果有去開街市既朋友都會知,乾爽既菜會比濕左水既菜貴。吾單止濕左既菜會重d,更加因為濕既菜比乾既菜更難保存。所以濕左既菜,如果係背囊焗住,夜晚煮就會發現好多都爛左。

軟vs硬
圖片取自網絡
另一方面,其實蔬果有d 比較軟身。所以一定吾能夠放係背囊底。例如蕃茄。但係薯仔就吾同,薯仔本身硬好多。所以放係底都吾怕爛。

不過如果帶好似南瓜呢一似既瓜果,就要再稔稔到底你會切定去定去到先切。因為個皮太厚,處理就會比較麻煩。 而且切好既南瓜吾會帶氧化會影響,所以切好帶上山其實都係一個吾錯既選擇。

雞蛋:
雞蛋係一款非常好食既食材。但係帶既時候,就十分吾方便。因為雞蛋易醉,所以處理要特別小心。

處理方法:
蛋同米一齊放 - 以前經常會上山煮飯。所以一定會帶米。將米同蛋一齊放入煮食既煲入面。因為煲係鐵,所以吾怕跌或者撞。其次,係因為米會吸震,所以吾怕打爛。但係要留意,米一定要埋住所有蛋。其次係,蛋一定要放中間位置,吾好直接接觸到煲。如果吾係,都係會打爛。

圖片取自網絡

當然,係市面上見到好多重用既蛋盒。不過港女個人都吾會買呢一類產品。

首先,如果蛋盒既大細同買番黎既蛋有出入,其實仲易打爛。其次,係超市買蛋個陣,其實個膠蛋盒已經做到保護作用。只要放背囊頂。吾好壓住,保護已經足夠。另一方面,個蛋盒係硬既膠,所以會有一定既重量。對於又懶又吾願拎野既港女而言,多一件物品,等於多一件重量。何必要拎多一件,作用吾太大既物品呢。與此同時,如果上山要帶走垃圾個陣,其實膠蛋格屬於可以壓扁,壓縮既垃圾。而蛋盒就吾可以,一樣甘大舊。所以港女本住「可免則免」既宗旨上山,務求所有物品都可以一物多用。吾會辜負自己付出既勞力。

港女係呢到再次呼籲各位讀者,請愛護大自然,自己垃圾,自己帶走。拎幾多上去,拎幾多落黎。

下星期,會分享港女多年係露營同遠足既食譜。

如果作為新手既你,或者經驗十足既你 睇完,歡迎大家留言比comment 。如果仲意港女既專欄,請大家大家訂閱港女既專欄,睇第一手最新既文章。亦都多謝支持港女既朋友。下次再見。

https://sports.fanpiece.com/hkgirlandtrail/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→