紫色競技場 精選

巴黎奧運進入第二星期，田徑項目陸續在法蘭西體育場(Stade de France)展開，大家除了關注百米飛人的誕生外，唔知又有冇留意到今屆巴黎田徑場上並非採用傳統的紅色賽道，而是換上紫色呢？

整個法蘭西體育場(Stade de France)以紫色為主色調：跑道為淺紫色、技術區域為深紫色、跑道外則是灰色。其實國際奧委會並沒有強制規定跑道顏色，2016年巴西里約奧運曾經將跑道改為藍色，所以非紅色跑道並非在今屆巴黎奧運第一次採用。

咁究竟點解會咁特別用上紫色呢？最主要的原因並非關於體育競技方面，而係好單純的兩個字：「美感」。大會認為紫色可以令現場及電視機旁的觀眾、以及參賽者留下深刻印象；同時在視覺效果上，佢哋認為紫色從電視轉播看起來可以更凸顯運動員的存在，相信呢個亦解釋了點解今屆的乒乓波檯以及巴黎大皇宮劍擊場的氛圍都用上了紫色。
除了採用破格的紫色外，今屆的跑道並非採用傳統的煤渣和瀝青製造，而是由橡膠製成，從而令選手有更好的抓地力；同時跑道底層係氣囊，當運動員跑過時跑道表面被壓縮，可以吸收來自選手腳部的衝擊力，之後氣囊又會恢復原狀，呢種設計是為了減少運動員的體能消耗，從而令佢哋有更好的發揮，我哋就即管睇下今屆係咪會有特別多新世績在此刷新！


場上的波兒 (ig: ballonfields): 自細對波類運動情有獨鍾的紅魔躉；同時亦係一名球壇黑氣石，球迷生涯但凡親身入場未曾見證所捧的球隊贏波，不勝率為100%。