跑鞋評測【Running News 跑場新聞 X Athletics Nation Running Pro-shop 運動國】 文字

【Brooks Neuro】

「咦?喂!乜 Rxxbok 嚟嘅?!」

當我第一眼見到呢款將於今年初推出嘅 Brooks Neuro 時候,喺腦中閃出就係呢句話……… (數年前我曾試著過 Reebxx 一款新跑鞋 Zxgxxg 印象令我非常之難忘;“難忘”嘅原因通常兩種,一係對鞋好正,一係就好唔掂,究竟係邊種你哋自己估……)

由2016年第一季開始,Brooks 會將佢哋全線跑鞋按跑者嘅不同經驗同埋取向,歸納為“Cushion”、“Energize”、“Connect”、同埋“Propel”四類,而 Neuro 就係“Propel”類別中最新鞋款,“Propel”類別嘅跑鞋係強調速度的表現同埋提升。

Neuro 嘅鞋底設計可謂非常破格,一個個耐磨橡膠加 BioMogo DNA 嘅圓形 Propulsion Pods 組成整個鞋底,形狀就好似踩住成餅“雞蛋仔”咁樣😁;其實呢種鞋底設計喺之前嘅 PureConnect 4 或 PureCadence 4 已經採用,不過喺 Neuro 上就玩得更加誇張。既然 Neuro 係被定位為速度型高性能跑鞋,但係鞋底一舊二舊咁,究竟跑唔跑得郁㗎?答案係“得”嘅!因為 Propulsion Pods 嘅分佈面積廣闊(尤其前腳掌位置),而且中底加入 Guidance Plates 支撐,當我用較快步速跑 tompo running 時感覺比一般速度訓練鞋穩定,toe off 時反應尚算迅速。要比較嘅話,雖然速度感唔及 T7 Racer,但穩定性同支撐就絕對係佢之上。

另一個較特別地方就係所謂 Gear Mechanism 嘅鞋底設計;佢係一條喺中掌嘅“斜線斷層”直接將前腳掌同埋後踭分成兩截,而傾斜角度更係同腳部喺高速跑動時嘅自然 supination 相配合,據講係可以令腳掌造出更強而有力嘅 push off,但畀我更直接嘅感覺就係腳掌嘅靈活性的確幾高。

鞋身面係用有“蛇皮”look嘅透氣膠網面、內襯大網眼尼龍構成,都算係幾通爽。而最值得一提就係 Hammock 嘅鞋帶系統,設計概念唔算複雜,只係用一係彈性尼龍繩索將每邊其中三個鞋帶孔相連起,但貼腳同埋穩定鞋身嘅效果就非常明顯。喺最初試著期間,有“鞋帶整齊強迫症”😁嘅我每次都好努力咁想將每個鞋帶扣對稱好,但係每次跑完返嚟都會見到個別移位嘅情況…… 原來係佢會配合我嘅腳面形態而“走位”㗎!之後我就冇再整理佢lu。

Neuro 嘅鞋重(9.4oz/6mm off set) 係 Launch 2(9.9oz/10mm off set) 同埋 T7 Racer(6oz/8mm off set) 之間,雖然速度感唔及 T7 Racer (梗係啦,對鞋重咁多),不過穩定性同靈活度就係兩者之上,而整體上各方面嘅平衡都做得恰度好處,顯然廠方喺呢款鞋上落咗唔少功夫。雖然 US$130 呢個價位唔講得上親民,而且外型上亦唔係“人見人愛”嗰隻,但如果你最終放膽一試嘅話,我相信你係唔會後悔嘅😉

評分 (純屬個人意見,以速度型跑鞋作標準)
速度感:7
穩定度:8.5
緩震度:8
合腳度:8
耐用度:??
價錢:6


評測員:Chris@Athletics Nation
標籤: 跑鞋  評測  運動國  
【球迷世界 X Futbol Trend 睇波之夜 — 曼車大戰】

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→